رواں سال ایشیا کپ کی میزبانی شیڈول کے مطابق پاکستان نے کرنی ہے لیکن پاک بھارت کشیدگی کے سبب پاکستان میں ایونٹ کا انعقاد نہیں ہو سکے گا اور ایشیا کپ کی میزبانی کے لیے متحدہ عرب امارات اور سری لنکا مضبوط امیدوار ہیں۔
بی سی سی آئی کے صدر اور بھارتی ٹیم کے سابق کپتان سارو گنگولی نے نجی ٹی وی سے گفتگو کرتے ہوئے کہا کہ ستمبر میں شیڈول ایشیا کپ منسوخ ہو گیا ہے تاہم پاکستان کرکٹ بورڈ نے معاملے لاعلمی کا اظہار کیا ہے۔
گنگولی کا یہ بیان ایک ایسے موقع پر سامنے آیا ہے جب گزشتہ ماہ ہی پاکستان کرکٹ بورڈ(پی سی بی) کے چیف ایگزیکٹو وسیم خان نے کہا تھا کہ ایشیا کپ شیڈول کے مطابق سری لنکا یا متحدہ عرب امارات میں منعقد ہو گا۔
دوسری جانب پاکستان کرکٹ بورڈ کے ترجمان نے بھارتی کرکٹ بورڈ کے سربراہ کے بیان سے لاعلمی کا اظہار کیا ہے۔
انہوں نے کہا کہ پاکستان کرکٹ بورڈ کو ایشیا کپ ٹی 20 کے التوا کے حوالے سے ایشین کرکٹ کونسل سے کوئی بھی اطلاع موصول نہیں ہوئی۔
انٹرنیشنل کرکٹ کونسل(آئی سی سی) رواں سال ٹی20 ورلڈ کپ کے مستقبل کا بھی فیصلہ کرے گی جو اکتوبر نومبر میں آسٹریلیا میں شیڈول ہے اور کورونا وائرس کے سبب اس کا انعقاد کھٹائی میں پڑتا نظر آ رہا ہے۔
اگر یہ دونوں ایونٹس منسوخ ہو جاتے ہیں تو اس سے بھارت کی اربوں روپے مالیت کی انڈین پریمیئر(آئی پی ایل) کے انعقاد کی راہ ہموار ہو سکتی ہے۔
اس لیگ کا انعقاد اپریل میں ہونا تھا لیکن کورونا وائرس کے سبب لیگ کا انعقاد نہیں ہو سکا تھا جس سے بھارت کو کروڑوں ڈالر کے نقصان کا خدشہ ہے۔
سارو گنگولی نے کہا کہ ہمیں نہیں معلوم کہ آئی پی ایل کا انعقاد کب ہو گا کیونکہ اس شیڈول میں وقت نکالنا مشکل ہے، ابھی ہمیں آئی سی سی کی جانب سے واضح ہدایات مل چکی ہیں کہ ہم آئی پی ایل کے بارے میں بات نہیں کر سکتے کیونکہ ہمارے پاس وقت نہیں اور ہمیں دسمبر میں آسٹریلیا کا دورہ کرنا ہے۔
ان کا کہنا تھا کہ آئی سی سی اکتوبر میں ٹی20 ورلڈ کپ کے انعقاد کی کوشش کر رہا ہے کیونکہ آئی سی سی کو اس سے بہت زیادہ آمدن ہوتی ہے۔
بھارتی معیشت کو آئی پی ایل سے 11ارب ڈالر کی آمدن ہوتی ہے اور اسی لیے بھارتی بورڈ لیگ کے انعقاد کے لیے کوشاں ہے۔
گنگولی نے کہا کہ ہم اس کے انعقاد کی پوری کوشش کریں گے کیونکہ یہ بھارت کے لیے بہت ضروری ہے، ہم بھارت میں اس کے انعقاد کی کوشش کریں گے اور کوشش کریں گے کہ تین چار مقامات ڈھونڈ سکیں جہاں کورونا وائرس نہ ہو۔
بھارت میں لیگ منعقد نہ ہونے کی صورت میں انہوں نے لیگ کو بیرون ملک منتقل کرنے کا بھی عندیا دیا اور متحدہ عرب امارات اور سری لنکا اس حوالے سے پہلے ہی اپنی دلچسپی کا اظہار کر چکے ہیں۔
بھارتی میڈیا میں خبریں زیر گردش تھیں کہ نیوزی لینڈ میں بھی لیگ کا انعقاد کیا جا سکتا ہے لیکن گنگولی نے ان تمام باتوں کو افواہ قرار دیتے ہوئے کہا کہ یہ سب کہانیاں ہیں اور اب تک اس بارے میں کوئی بات نہیں ہوئی۔
یاد رہے کہ انتخابات سے ٹکراؤ کے سبب دو مرتبہ انڈین پریمیئر لیگ کو بیرون ملک منعقد کیا جا چکا ہے۔
2009 میں انڈین پریمیئر لیگ جنوبی افریقہ میں منعقد ہوئی تھی جبکہ 2009 میں لیگ کا پہلا مرحلہ متحدہ عرب امارات میں منعقد ہوا تھا۔aa
