پاکستانی ٹیم کا رواں سال اگست ستمبر میں دورہ انگلینڈ شیڈول ہے جس میں 3 ٹیسٹ اور 3 ٹی20 میچز کھیلے جائیں گے۔
پاکستان کرکٹ بورڈ (پی سی بی) کی جانب سے جاری اعلامیے میں دونوں کھلاڑیوں کی دورہ انگلینڈ کے لیے عدم دستیابی سے آگاہ کردیا۔
پی سی بی نے کہا کہ فاسٹ باؤلر محمد عامر اور مڈل آرڈر بیٹسمین حارث سہیل نے نجی مصروفیات کی بنا پر دورہ انگلینڈ پر روانگی سے معذرت کرلی۔
محمد عامر کے ہاں اگست میں بچے کی پیدائش متوقع ہے جبکہ حارث سہیل نے فیملی وجوہات کی بنا پر دورے سے معذرت کی۔
پی سی بی نے دور انگلینڈ پر 28 کھلاڑیوں اور 14 پلیئر سپورٹ اسٹاف پر مبنی بڑے دستے کو انگلینڈ بھیجنے کا اعلان کیا ہے۔
بورڈ نے کہا کہ سیریز کے لیے پاکستان کے اسکواڈ کا اعلان جلد کردیا جائے گا۔
واضح رہے کہ کورونا وائرس کے باعث کرکٹ سمیت دنیا بھر کے کھیلوں کی سرگرمیاں بند ہیں۔
پاکستان ٹیم نے آخری مرتبہ پاکستان سپر لیگ میں شرکت کی تھی لیکن وائرس کی وجہ سے ایونٹ کو درمیان میں ہی روک دیا گیا تھا اور پلے آف مقابلے نہیں ہو پائے تھے۔
رواں ماہ انگلینڈ اور ویسٹ انڈیز کے درمیان سیریز سے کرکٹ کے سونے میدان پھر آباد ہوں گے اور کورونا کے سبب انٹرنیشنل کرکٹ کونسل نے نئے قوانین بھی متعارف کرا دیے گئے ہیں۔
عامر کے ہاں بچے کی پیدائش متوقع ہے جس کی وجہ سے وہ عمومی حالات میں بھی انگلینڈ کا دورہ نہیں کرتے لیکن حارث سہیل نے ممکنہ طور پر وائرس کے خوف کے پیش نظر دورے پر جانے سے معذرت کر لی ہے۔
ذرائع کے مطابق حارث سہیل نے کورونا کے خوف کی وجہ سے اپنے اہلخانہ کے اصرار پر دورہ انگلینڈ سے معذرت کی۔
باوثوق ذرائع نے مزید بتایا کہ حارث سہیل اور ان کی فیملی کورونا وائرس کے خوف کی وجہ سے حارث کے ٹیم کے ساتھ جانے کے حق میں نہیں تھے۔
قومی ٹیم کے بلے باز اب تک وائرس سے محفوظ اور وہ اور ان کے اہلخانہ بالکل صحتیاب ہیں لیکن کورونا کے خوف کی وجہ سے حارث نے احتیاطی تدابیر اختیار کرتے ہوئے انگلینڈ نہ جانے کا فیصلہ کیا۔
دوسری جانب حارث سہیل کی دستبرداری کےبعد ڈومیسٹک کرکٹ میں رنز کے انبار لگانے کے باوجود ایک عرصے سے نظر انداز فواد عالم کو اسکواڈ اور الیون میں موقع دیے جانے کا قوی امکان ہے۔
یاد رہے کہ دورہ انگلینڈ کے لیے ویسٹ انڈین بلے باز شیمرون ہیٹمائیر، ڈیرن براوو اور آل راؤنڈر کیمو پاؤل نے 25 رکنی اسکواڈ کا حصہ نہ بننے کا اعلان کیا تھا۔
یہاں یہ بات قابل ذکر ہے کہ پاکستان کرکٹ بورڈ نے پہلے ہی اعلان کردیا تھا کہ کھلاڑیوں کی صحت اولین ترجیح ہے اور وہ کسی بھی کھلاڑی پر دورہ انگلینڈ کے لیے دباؤ نہیں ڈالیں گے۔
