دنیا بھر میں اپنی تیز بولنگ سے دھاک بٹھانے والے پاکستان کرکٹ ٹیم کے مایہ ناز بولر شاہین شاہ آفریدی نے اپنے سسر سابق کپتان شاہد آفریدی کے ساتھ جم میں ورزش کی اور اس ورک آؤٹ کو ناقابل فراموش قرار دیدیا۔
شاہین شاہ آفریدی نے سماجی رابطے کی ویب سائٹ ٹوئیٹر پر اپنے ہونے والے سسر شاہد آفریدی کے ہمراہ ایک تصویر شیئر کی اور اس تصویر کے کیپشن میں لکھا ہے کہ ‘ ورک آؤٹ کرنے کا اصل مزا تب شروع ہوتا ہے جب آپ لالہ کے ساتھ جم جائیں۔’
یاد رہے کہ شاہین شاہ آفریدی کا رشتہ کرکٹ کی دنیا میں اپنی بیٹنگ سے اچھے اچھے بولر کے چھکے چھڑا دینے والے لیجنڈری آل راؤنڈر شاہد آفریدی کی صاحبزادی سے طے ہوا ہے جس کی دونوں خاندانوں کی جانب سے تصدیق بھی کی جاچکی ہے۔
واضح رہے کہ شاہین شاہ آفریدی کھیل کے میدان میں اپنے ہونے والے سسر شاہد آفریدی کی 10 نمبر والی شرٹ استعمال کرتے ہیں اور اس کی وجہ ان کی شاہد آفریدی سے محبت ہے۔
فاسٹ بولر شاہین آفریدی نے اپنے 10 نمبر کے ٹی شرٹ کی کہانی بیان کرتے ہوئے کہا کہ پہلے شرٹ کا نمبر 40 تھا لیکن میں چاہتا تھا کہ 10 نمبر مجھے ملے کیوں کہ لالہ (شاہد آفریدی) یہ نمبر استعمال کرتے ہیں اور وہ بچپن سے میرے فیورٹ ہیں میری خواہش تھی کہ مجھے 10 نمبر ملے اور آفریدی نام اس پر لکھا ہو۔
