گلیڈی ایٹرز کے ٹیم منیجر اعظم خان نے بتایا کہ شاہد آفریدی کا انٹیجن ریپڈ ٹیسٹ منفی آ گیا ہے جس کے بعد انہوں نے اسکواڈ کو جوائن کر لیا ہے۔
شاہد آفریدی لیگ کے آغاز سے قبل ہی کورونا وائرس کا شکار ہو گئے تھے اور اسی وجہ سے ابتدئی میچز میں اپنی ٹیم کی نمائندگی نہیں کر سکے۔
ابتدائی طور پر یہ خدشہ ظاہر کیا جا رہا تھا کہ شاید وہ کراچی میں ہونے والے لیگ کے پہلے مرحلے میں اپنی فرنچائز کی نمائندگی نہ کر سکیں تاہم اب ان کا ٹیسٹ منفی آ گیا ہے جس کے بعد وہ آنے والے میچز کے لیے گلیڈی ایٹرز کو دستیاب ہوں گے۔
دوسری جانب سے گلیڈی ایٹرز کے معروف انگلش اوپنر جیسن روئے اور جیمز ونس بھی بدھ کو اسکواڈ کو جوائن کر لیں گے۔
اس کے علاوہ افغان اسپنر نور احمد بھی انڈر19 ورلڈ کپ کی مہم ختم ہونے کے بعد گلیڈی ایٹرز کے اسکواڈ کا جلد حصہ بن جائیں گے۔
پشاور زلمی کے حضرت اللہ زازائی بھی کورونا وائرس سے صحتیاب ہو گئے ہیں اور انہوں نے بھی اسکواڈ کو جوائن کر لیا۔
پشاور زلمی کے لیے ایک اور خوش آئندہ خبر یہ بھی ہے کہ فاسٹ باؤلر ثاقب محمود بھی اپنی قومی ذمے داریوں سے فارغ ہونے کے بعد کل کراچی پہنچ جائیں گے۔
