پاکستان کے مایہ ناز وکٹ کیپر بلے باز محمد رضوان ٹی20 کرکٹ میں مسلسل شاندار کارکردگی کی بدولت پہلی مرتبہ ٹاپ ٹین بلے بازوں میں جگہ بنانے میں کامیاب ہو گئے۔
انٹرنیشنل کرکٹ کونسل(آئی سی سی) نے ٹی20 پلیئرز کی تازہ ترین درجہ بندی جاری کر دی ہے جس کے مطابق پاکستان کے وکٹ کیپر بلے باز محمد رضوان 5 درجے ترقی پا کر دسویں نمبر پر آگئے ہیں۔
جنوبی افریقہ اور زمبابوے کے خلاف ٹی 20 سیریز میں شاندار کارکردگی کی بدولت رضوان کے ریٹنگ پوائنٹس بڑھ کر 640 ہو گئے ہیں۔
رضوان کی اس سال ٹی20 کرکٹ میں کارکردگی شاندار رہی ہے اور اس سال 10 ٹی20 کرکٹ میں انہوں نے 10 میچوں میں ایک سنچری اور 5 نصف سنچریوں کی بدولت 106 کی اوسط سے 530 رنز بنا چکے ہیں۔
البتہ قومی ٹیم کے کپتان بابر اعظم کی بیٹنگ رینکنگ میں ایک درجہ تنزلی ہوئی ہے کیونکہ وہ زمبابوے کے خلاف سیریز میں زیادہ متاثر کن کھیل پیش نہ کر سکے۔
بابر اعظم ٹی20 سیریز کے 4 میچوں میں 119 رنز بنا سکے اور ایک درجہ تنزلی کے بعد دوسرے سے تیسرے نمبر پر آ گئے۔
انگلینڈ کے ڈیوڈ ملان 892 ریٹنگ پوائنٹس کے ساتھ بدستور پہلے نمبر پر براجمان ہیں جبکہ آسٹریلیا کے ایرون فنچ ایک درجہ ترقی پاکر دوسرے نمبر پر آگئے ہیں۔
نیوزی لینڈ کے ڈیوڈ کونوے چوتھے، بھارت کے ویرات کوہلی پانچویں، جنوبی افریقہ کے وین ڈر ڈوسن چھٹے، بھارت کے لوکیش راہل ساتویں، آسٹریلیا کے گلین میکسویل آٹھویں اور نیوزی لینڈ کے مارٹن گپٹل نویں نمبر پر ہیں۔
Super @iMRizwanPak ⚡
What a 2021 he is having! ? pic.twitter.com/kZsvvt45N1
— ICC (@ICC) April 27, 2021
باؤلرز کی رینکنگ میں ٹاپ ٹین میں کوئی تبدیلی واقع نہیں ہوئی اور کوئی بھی پاکستانی باؤلر 10 صف اول کے باؤلرز کی فہرست کا حصہ نہیں۔
بائولنگ رینکنگ میں جنوبی افریقہ کے تبریز شمسی پہلی پوزیشن پر موجود ہیں جبکہ افغانستان کے راشد خان دوسرے اور آسٹریلیا کے ایشٹن ایگار تیسرے نمبر پر ہیں۔
پاکستانی باؤلرز میں حارث رؤف 17 درجے ترقی کے بعد 21ویں اور محمد حسنین 52 درجے بہتری کے بعد 65 ویں نمبر پر آ گئے ہیں۔
حسنین کے ساتھ ساتھ لیگ اسپنر عثمان قادر بھی 65ویں نمبر پر موجود ہیں جنہوں نے یہ پوزیشن حاصل کرنے کے لیے 12 درجے ترقی کی۔
ٹیم رینکنگ میں قومی ٹیم دو اہم پوائنٹس گنوا چکی ہے لیکن اپنی چوتھی پوزیشن برقرار رکھنے میں کامیاب ہو گئی۔
قومی ٹیم کو 262 پوائنٹس برقرار رکھنے سیریز میں کلین سوئپ کرنا ضروری تھا لیکن ایک میچ ہارنے کی وجہ سے قومی ٹیم دو پوائنٹس گنوا بیٹھی۔
پاکستان کو ایک میچ میہں شکست دینے کی بدولت زمبابوے کی ٹیم ایک درجہ ترقی کر کے رینکنگ میں 11ویں نمبر پر آ گئی ہے۔
عالمی درجہ بندی میں انگلینڈ کی ٹیم پہلے، بھارت دوسرے، آسٹریلیا تیسرے، پاکستان چوتھے، نیوزی لینڈ پانچویں ، جنوبی افریقہ چھٹے، افغانستان ساتویں، ویسٹ انڈیز آٹھویں، سری لنکا نویں ، بنگلہ دیش دسویں، زمبابوے 11 اور آئرلینڈ 12 ویں نمبر پر موجود ہیں۔
