سعودی عرب میں غیرملکیوں کو صحت مند اور فعال طرز زندگی فراہم کرنے کے لیے بڑے شہروں میں قومی کرکٹ چیمپئن شپ کا انعقاد کیا گیا ہے۔
مملکت کے 11 بڑے شہروں میں تارکین وطن کے لیے ٹی ٹوئنٹی کرکٹ چیمپئن شپ جاری ہے، اس ٹورنامنٹ کا انعقاد سعودی اسپورٹس فار آل فیڈریشن اور سعودی عربین کرکٹ فیڈریشن کی جانب سے کیا گیا، چیمپئن شپ کا آغاز 14 فروری(اتوار) سے ہوا ہے۔
قومی کرکٹ چیمپئن شپ اپریل تک جاری رہے گی۔ ٹورنامنٹ میں 11 ہزار رجسٹرڈ کھلاڑی حصہ لے رہے ہیں جبکہ 450 آفیشلز کی خدمات بھی حاصل ہوں گی۔
اس چیمپئن شپ کے علاوہ سعودی عرب میں سافٹ بال کرکٹ ٹورنامنٹ،سوشل کرکٹ پروگرام اور ورکرزکیمپ ایکٹیویشن سرگرمیوں کا سلسلہ بھی سال بھر جاری رہے گا۔ تارکین کے لیے قومی کرکٹ چیمپئن شپ میں 369 ٹیمیں اور 15 کرکٹ ایسوسی ایشنز شامل ہیں۔ ملک کے مختلف بڑے گراؤنڈز میں ہر جمعے میچز کھیلے جارہے ہیں۔
چیمپئن شپ کے میزبان شہروں میں نجران، القسیم، جیزان، ابھا، تبوک، ینبع، مدینہ، جدہ، جبیل، دمام اور ریاض سمیت دیگر شامل ہیں۔ قومی کرکٹ چیمپیئن شپ کے ساتھ سافٹ بال کرکٹ ٹورنامنٹ دو مرحلوں میں ہوگا۔
سافٹ کرکٹ ٹورنامنٹ کا پہلا مرحلہ فروری اور اپریل کے درمیان جبکہ دوسرا اکتوبر اور نومبر کے درمیان کھیلا جائے گا۔ حکومت نے کھیلوں کے مقابلے کے دوران احتیاطی تدابیر اپنانے پر زور دیا ہے۔
