زمبابوے کی کرکٹ ٹیم ون ڈے اور ٹی 20 سیریز میں شرکت کے لیے پاکستان پہنچ گئی ہے لیکن ٹیم کے ساتھ بھارت سے تعلق رکھنے والے کوچ لال چند پاکستان نہیں آئے۔
بھارت اور پاکستان کے درمیان کشیدہ تعلقات صرف دونوں ٹیموں کے آپسی میچز تک ہی محدود نہیں بلکہ اب زمبابوین ٹیم کے بھارتی کوچ بھی اسی وجہ سے پاکستان کے دورے پر ٹیم کے ہمراہ نہیں آسکے۔
ہرارے میں پاکستانی سفارتخانے نے دورے کے لیے لال چند راجپوت کے ویزہ کا اجرا کردیا تھا لیکن بھارتی سفارتخانے نے زمبابوے کرکٹ کو خط لکھ کر دورے سے استثنی کی درخواست کی تھی۔
@ZimCricketv head coach @Lalchandrajput7 will miss the @TheRealPCB tour after the Embassy of India in Harare wrote to @ZimCricketv asking that he be exempted from visiting Pakistan. The Embassy of Pakistan in Harare had issued a visa to Rajput.#PAKvZIM | #LalchandRajput pic.twitter.com/LQ7LExKFic
— Zimbabwe Cricket (@ZimCricketv) October 20, 2020
بھارتی سفارتخانے نے تحریر کیا تھا کہ اپنے شہریوں کے سفر کے حوالے سے بھارتی حکومت کی پالیسیوں کی وجہ سے بھارتی شہری لال چند راجپوت کو محدود اوورز کے میچز پر مشتمل دورہ پاکستان سے استثنیٰ دیا جائے۔
زمبابوے کرکٹ نے بھارتی حکومت کی اس درخواست کو منظور کرتے ہوئے ہیڈ کوچ کو دورے سے استثنیٰ دے دیا۔
ہیڈ کوچ لال چند راجپوت کی غیرموجودگی میں زمبابوے نے باؤلنگ کوچ ڈگلس ہونڈو کو پاکستان کے خلاف ون ڈے اور ٹیی 20 سیریز کے لیے ٹیم کا قائم مقام ہیڈ کوچ مقرر کردیا ہے۔
واضح رہے کہ زمبابوے کی ٹیم آج محدود اوورز کی سیریز کھیلنے کے لیے پاکستان پہنچی ہے۔
پاکستان اور زمبابوے کے درمیان سیریز میں تین ون ڈے اور تین ٹی 20 میچوں کی سیریز کھیلی جائے گی، جس کا آغاز 30 اکتوبر سے ہو گا۔
پاکستان اور زمبابوے کے درمیان پہلا ایک روزہ کرکٹ میچ 30 اکتوبر کو پنڈی کرکٹ اسٹیڈیم میں کھیلا جائے گا جس کے بعد دونوں ٹیمیں یکم اور تین نومبر کو دوسرے اور تیسرے ون ڈے میچ مدمقابل ہوں گی۔
اس کے بعد زمبابوے کرکٹ ٹیم لاہور کا سفر کرے گی جہاں پر پانچ اور چھ نومبر کو پریکٹس کے بعد وہ 7 نومبر کو قذافی اسٹیڈیم میں پہلا ٹی20 میچ کھیلے گی۔
سیریز کے بقیہ دونوں ٹی20 میچز 8 اور 10 نومبر کو کھیلے جائیں گے اور 12 نومبر کو زمبابوے کی ٹیم ہرارے کے لیے روانہ ہو جائے گی۔
