سندھ حکومت کے ماتحت ہونے سے کے ڈی اے مسلسل خسارے میں

کراچی ( اسٹاف رپورٹر) ادارہ ترقیات کراچی کی ایمپلائز یونین کے سرپرست اعلیٰ نوید انور صدیقی نے کہا ہے کہ ڈائریکٹر جنرل کے ڈی اے ڈاکٹر سیف الرحمان ایک سلجھے ہوئے افسر ہیں اس لیے ان سے ادارے کے ملازمین کو ان کے مسائل کے حل کے لیے ان سے بڑی امیدیں وابستہ ہیں، وہ بیک وقت ایم سی بلدیہ عظمیٰ اور ڈی جی ادارہ ترقیات ہیں اس لیے بھی وہ دونوں اداروں کے ما بین جاری تنازعات کے حل میں کلیدی کردار ادا کر سکتے ہیں،، نوید انور صدیقی نے گفتگو کرتے ہوئے کہا کہادارہ ترقیات کے آمدنی والے محکمے ماسٹر پلان اور سندھ بلڈنگ کنٹرول اتھارٹی کے ذریعہ سندھ حکومت کے ماتحت ہونے سے کے ڈی اے مسلسل خسارے میں ہے اور تنخواہوں کی ادائیگی نہ ممکن ہے۔ ایک طرف مذخورہ اور دیگر اداروں پر واجبات ہیں جبکہ سوک سینٹر سمیت دیگر کے ڈی اے کی عمارتوں میں میں قائم نجی و دیگر سرکاری اداروں پر بھی کرائے کی مد میں اربوں روپے کے واجبات ہیں، ہمیں اپنے ڈائریکٹر جنرل سیف الرحمان سے امید ہے کہ وہ ان واجبات کی وصولی میں اور چھینے گئے محکموں کو کے ڈی اے کے ماتحت لان میں بھی اپنا اہم کردار ادا کرتے ہوئے جلد اقدامات کریں گے۔ انہوں نے کہا کہ ایمپلائز یونین ان کی ان کوششوں میں بھر پور تعاون کرے گی اور واجبات کی وصولی کے لیے ضرورت پڑنے پر احتجاجی مظاہرے سمیت ہر طرح کے احتجاج کے لیے تیار ہے تاکہ کے ڈی اے اپنے پیروں پر کھڑا ہو سکے اور ملازمین کو انکی ماہانہ اجرت وقت پر مل سکے۔