مغربی کنارے میں قابض اسرائیلی فوج کی فائرنگ سے کم از کم دو فلسطینی شہید ہو گئے۔
بین الاقوامی میڈیا رپورٹس کے مطابق اسرائیلی فورسز نے مقبوضہ مغربی کنارے کے شہر جیریکو میں پناہ گزینوں کے کیمپ پر چھاپے کے دوران دو فلسطینیوں کو شہید کر دیا ہے۔
جیریکو ہسپتال کے ڈائریکٹر نے منگل کو صحافیوں کو بتایا ہے کہ دو نوجوانوں کو ہسپتال لایا گیا ہے جن کے سینے میں گولیاں لگی ہیں۔
فلسطینی وزارت صحت نے کہا کہ 16 سالہ قصے الوالجی اور 25 سالہ محمد نجوم کو اسرائیلی فورسز نے “آج صبح سویرے جیریکو پر حملے کے دوران” سینے میں گولی ماری۔
رپورٹس کے مطابق علاقے کے رہائشیوں کا کہنا تھا کہ اسرائیلی فورسز کے ساتھ مسلح جھڑپیں ہوئیں لیکن یہ معلوم نہیں ہو سکا کہ آیا دونوں مقتولین اس میں ملوث تھے۔
مقبوضہ مغربی کنارے میں گزشتہ مہینوں کے دوران علاقے میں پناہ گزینوں کے کیمپوں پر اسرائیلی چھاپوں، فلسطینی دیہاتوں پر یہودی آباد کاروں کے حملوں میں مزید اضافہ ہوا ہے۔
