سویڈن اور نیدرلینڈز میں قرآن پاک کی بےحرمتی کے واقعات کیخلاف سینیٹ میں مذمتی قرارداد متفقہ طور پر منظور کرلی گئی۔قرارداد میں کہا گیا ایوان بالا واقعات پر گہرے رنج و غم کا اظہار کرتا ہے۔ حکومت کی جانب سے اقوام متحدہ سمیت ہر فورم پر احتجاج ریکارڈ کرانے کا بھی فیصلہ کیا گیا۔
سینیٹ اجلاس میں وزیر قانون اعظم نذیر تارڑ کا کہنا تھا اپنی بین الاقوامی اور سفارتی ذمہ داریوں سے مکمل طور پر آگاہ ہیں معاملے پر کوئی کوتاہی نہیں برتی جائے گی۔
اجلاس میں یوسف رضا گیلانی، مشاہد حسین سید سمیت مختلف جماعتوں کے سینٹیرز کی جانب سے واقعے کی شدید الفاظ میں مذمت کی گئی۔ مسلم لیگ نون کے سینیٹرعرفان صدیقی نے دنیا میں اسلام کا مثبت تشخص اجاگر کرنے کی ضرورت پر زور دیا۔
