فتح آباد کے ایڈشنل ڈسٹرکٹ جج بلونتسنگھ نے 63 سالہ امر پوری کو بچوں سے جنسی جرائم سے تحفظ دینے کے قانون کے تحت 14 سال، ضابطہ فوجداری کے تحت دو ریپ کیسز میں بالترتیب 7 سال اور آئی ٹی ایکٹ کے تحت 5 سال قید کی سزا سنائی، تاہم جعلی عامل کو اسلحہ کیس سے بری کیا گیا۔
رپورٹ کے مطابق جعلی عامل ’جلیبی بابا‘ کسی پریشانی کی صورت میں مدد کے لیے رجوع کرنے والی خواتین کو نشہ دے کر ان کا ریپ کرکے برہنہ وڈیوز بناتا تھا جس پر وہ متاثرہ خواتین کو بلیک میل کرتا تھا کہ اگر پیسے نہ دیے گئے تو وہ وڈیوز جاری کردے گا۔
متاثرین کے وکیل سنجے ورما نے کہا کہ ملزم کو تمام سزائیں ایک ساتھ ہوں گی اور جعلی عامل 14 سال جیل میں گزارے گا۔
فتح آباد کی عدالت نے 5 جنوری کو خود ساختہ عامل امرپوری عرف بلو کو ریپ کیسز کے الزامات میں مجرم قرار دے دیا۔
رپورٹ کے مطابق متعدد خواتین میں سے 6 متاثرہ خواتین بطور متاثرہ عدالت میں پیش ہوئیں اور عدالت نے تینوں متاثرین کے بیانات کی بنیاد پر فیصلہ سنایا۔
رپورٹ کے مطابق ہریانہ پولیس نے 2018 میں ملزم امرپوری کو فتح آباد کے ٹوہانہ قصبے سے گرفتار کیا تھا اور اس کے موبائل فون سے 120 مبینہ جنسی وڈیو کلپس برآمد ہوئیں تھیں۔
فتح آباد خواتین کے پولیس سیل کی انچارج بملا دیوی نے تصدیق کی تھی کہ ملزم امرپوری کے موبائل فون سے 120 برہنہ وڈیو کلپنس برآمد ہوئی تھے۔
رپورٹ میں بتایا گیا ہے کہ تحقیقات کے دوران یہ بات سامنے آئی کہ خواتین اپنے مسائل کے حل کے لیے امرپوری سے رجوع کرتی تھیں کیونکہ ملزم نے تانترک کے طور پر شہرت حاصل کی تھی۔
رپورٹ کے مطابق ملزم مبینہ طور پر خواتین کو نشہ دے کر ریپ کا نشانہ بناتا تھا جس کے بعد ان کی برہنہ وڈیوز بناتا تھا اور ان وڈیوز کی بنیاد پر متاثرہ خواتین کو پیسے نہ دینے کی صورت میں وڈیوز رلیز کرنے کی دھمکی دے کر بلیک میل کرتا تھا۔
