امریکی محکمہ خارجہ کے ترجمان نیڈ پرائس نے کہا ہے کہ دہشتگردی کے خلاف دفاع کرنا پاکستان کا حق ہے, افغانستان دہشت گردی کا لانچنگ پیڈ نہ بنے، پاکستانی عوام نے دہشت گرد حملوں سے شدید نقصان اٹھایا ہے، جائزہ لے رہے ہیں کہ طالبان کے فیصلوں کے خلاف کیا اقدامات کیے جا سکتے ہیں۔
واشنگٹن میں پریس بریفنگ کے دوران امریکی محکمہ خارجہ کے ترجمان نیڈ پرائس نے کہا کہ افغان طالبان اپنے وعدے پورے نہیں کر رہے، امریکا صورتحال کو مانیٹر کر رہا ہے اور اس حوالے سے ردعمل دیا جائے گا۔
ترجمان امریکی محکمہ خارجہ نیڈ پرائس کے مطابق پاکستان کی قومی سلامتی کمیٹی کے بیانات سے آگاہ ہیں۔ دہشتگردی کے خلاف دفاع کرنا پاکستان کا حق ہے۔
انہوں نے کہا کہ طالبان اپنے وعدوں کو پورا کریں، یقینی بنایا جائے کہ افغان سرزمین دہشتگردی کے لیے لانچنگ پیڈ کے طور پر استعمال نہ ہو۔ ہم جائزہ لے رہے ہیں کہ طالبان کے فیصلوں کے خلاف کیا اقدامات کر سکتے ہیں۔
ترجمان امریکی محکمہ خارجہ نے مزید کہا کہ افغانستان میں خواتین کو کام کی اجازت دینی چاہیے۔
