غیرملکی خبررساں ادارے کی رپورٹ کے مطابق برطانیہ میں جزوی طور پر کاروباری مراکز کھل چکے ہیں اسی ضمن میں بورس جانسن نے ملازمین اور تاجروں کو مشورہ دیا ہے کہ وہ سفر کے لیے پبلک ٹرانسپورٹ کا استعمال نہ کریں۔
انہوں نے کہا کہ پیدل چلنا یا سائیکل کے ذریعے مقررہ مقام پر پہنچنا کورونا وائرس سے بچاؤ میں معاونت کرے گی۔ ملک میں شہری گھر سے کام کرنے کے بجائے اب آہستہ آہستہ دفاتر کا رخ کررہے ہیں۔
رپورٹ کے مطابق برطانیہ میں لاک ڈاؤن کے دوران معاشی پلان تشکیل دیا جاچکا ہے۔ جبکہ مذکورہ منصوبے کے تحت لوگوں کو ٹیوبس، ٹرینوں اور بسوں سے دور رکھنا ہے جہاں ان کے متاثر ہونے کا خطرہ ہے۔
حکام کا کہنا ہے کہ وہ شہریوں کی معاشی سرگرمیوں کے دوبارہ آغاز کو محفوظ بنانا چاہتے ہیں۔
یاد رہے کہ گزشتہ روز میڈیا سے گفتگو کرتے ہوئے وزیر اعظم بورس جانسن کا کہنا تھا کہ لاک ڈاؤن نہیں ہٹا سکتے، نئے قوانین کے تحت لاک ڈاؤن میں نرمی کر دی ہے، ڈرائیونگ اور کام کی محدود اجازت دی جا رہی ہے، خاندان کے افراد بھی اب مل کر گھروں سے باہر کھیل کود سکیں گے۔
