کورونا وائرس میں مبتلا نرس جان کی بازی ہار گیا، نعمان کی عمر تیس سال تھی، وہ کورونا وائرس کا شکار تھے اور انتہائی نگہداشت وارڈ میں زیرعلاج تھے۔
رپورٹ کے مطابق جاں بحق نرس نعمان ان ہیلتھ ورکرزمیں شامل تھے جوکورونا کیخلاف خدمات انجام دے رہے ہیں۔
ینگ نرسز ایوسی ایشن کے چیئرمین اعجاز کلیری کا کہنا ہے کہ وائے ڈی اے کو اپنی نرسز پر فخر ہے کہ وہ اس عالمی وبا میں فرنٹ لائن ہیروز کے طور پر اپنی زندگی کا خیال کیے بغیر ملک اور قوم کی خدمت میں پیش پیش ہیں۔
واضح رہے کہ سندھ میں کورونا وائرس سے پہلا نرس جاں بحق ہوا ہے، گزشتہ روز کورونا وائرس میں مبتلا ڈاکٹر فرقان جاں بحق ہوگئے تھے۔
دوسری جانب محکمہ صحت سندھ کا کہنا ہے کہ کراچی میں کورونا کے باعث مزید 9 مریض جاں بحق ہوگئے، جاں بحق افراد میں ایک خاتون اور 8 مرد شامل ہیں۔
ترجمان محکمہ صحت کا کہنا ہے کہ سانگھڑ، حیدرآباد میں بھی ایک، ایک مریض کورونا سے جاں بحق ہوا، 24 گھنٹوں کے دوران سندھ میں 307 کرونا کیسز رپورٹ ہوئے، کراچی میں 253 افراد میں کورونا کی تصدیق ہوئی۔
محکمہ صحت سندھ کے مطابق سندھ میں کورونا متاثرہ افراد کی تعداد 8 ہزار 189 ہوگئی، کراچی میں کورونا سے متاثرہ افراد کی تعداد 5 ہزار 943 ہوگئی، سندھ میں کورونا کے 1671 مریض صحت یاب ہوچکے ہیں جبکہ سندھ میں اموات کی تعداد 148 ہوگئی۔
