شہریوں کو بنیادی سہولیات کی فراہمی ممکن بنانے کے لئے ادارہ ترقیات کراچی اپنے وسائل کا بھرپور استعمال کررہا ہے،ڈائریکٹر جنرل ادارہ ترقیات کراچی

کراچی ( پ ر )ہمیں مستقبل میں ایسے عملی اقدامات کرنے کی ضرورت ہے جس سے آئندہ آنے والی نسلیں استفادہ حاصل کرسکیں۔ شہریوں کو بنیادی سہولیات کی فراہمی ممکن بنانے کے لئے ادارہ ترقیات کراچی اپنے وسائل کا بھرپور استعمال کررہا ہے۔ شہر بھر میں سندھ حکومت کے تعاون سے ترقیاتی کام جاری ہیں۔ان خیالات کا اظہار ڈائریکٹر جنرل ادارہ ترقیات کراچی سید محمد علی شاہ نے اتوار کو شہر بھر میں جاری ادارہ ترقیات کراچی کے زیر اثر ترقیاتی اسکیموں کے ہنگامی دورہ کے دوران کیا۔ اس موقع پر ڈی جی کے ڈی اے سید محمد علی شاہ کو متعلقہ افسران نے شہر بھر میں جاری ترقیاتی کاموں کے بارے میں تفصیلات فراہم کی۔ سندھ گورنمنٹ ADP کے تحت شہر بھر میں تمام اضلاع میں جاری 142 سے زائد اسکیموں جن میں شاہراہوں کی تعمیر،نالہ کی تعمیر، گلیوں کی مرمت سمیت مختلف شاہراہوں پر ترقیاتی کام جاری ہے۔ شاہراہوں کی تعمیر و مرمت کے ساتھ ساتھ نکاسی آب کے لئے خصوصی اقدامات کئے جارہے ہیں۔ ڈائریکٹر جنرل سید محمد علی شاہ نے جاری ترقیاتی کاموں کی رفتار پر اطمینان کا اظہار کرتے ہوئے متعلقہ انجینئرز کو ہدایت جاری کی کہ متعلقہ افسران اس بات کو یقینی بنائیں کہ مقررہ مدت سے قبل شہر بھر میں جاری ترقیاتی کاموں کو مکمل کیاجائے۔ علاقہ کے معززین نے اس موقع پر ڈائریکٹر جنرل کے ڈی اے سے ملاقات کے دوران علاقہ کے مسائل سے آگاہ کیا جس کی حل کے لئے ڈی جی کے ڈی اے نے متعلقہ افسران کو موقع پر ہدایت جاری کیں۔ اس موقع پر ڈی جی کے ڈی اے کے ہمراہ ممبر فنانس سید شجاعت حسین، سپرنٹنڈنگ انجینئر طارق رفیع و دیگر افسران موجود تھے۔