نئے مریضوں میں زیادہ تر کا تعلق دیگر ممالک سے ہے، جن کی گنتی 97 ہے جبکہ اومانی مریضوں کی تعداد 12 ہے۔ اومان کے وزیر صحت ڈاکٹر احمد محمد عبید السعیدی کے مطابق مملکت میں کورونا کے مزید 45 مریض صحت یاب ہو کر گھروں کو لوٹ گئے ہیں، جس کے بعد مجموعی طور پر شفا پانے والے افراد کی گنتی 176 ہو گئی ہے۔
اس موذی مرض کے باعث زندگی کی دوڑ سے باہر ہونے والے افراد کی گنتی 4 ہو گئی ہے۔ خدشہ ظاہر کیا جا رہا ہے کہ مملکت میں کورونا کے مریضوں کی گنتی کہیں زیادہ ہے، تاہم ابھی تک کئی مریضوں کے ٹیسٹ نہیں ہو پائے، جس کی وجہ سے صحیح تعداد سامنے نہیں آ سکی۔
ڈاکٹر السعیدی نے عام لوگوں پر زوردیا ہے کہ وہ عالمی ادارہ صحت کی جاری کردہ رہ نما ہدایات پر عمل پیرا رہیں۔
انھوں نے تمام شہریوں اور مکینوں سے کہا تھا کہ وہ اپنے گھروں ہی میں مقیم رہیں اور غیر ضروری نقل وحرکت سے گریز کریں۔ اومانی حکومت کی جانب سے کورونا کے متاثرین کی گنتی میں اضافہ کے بعد اس موذی وبا پر قابو پانے کے لیے سخت فیصلے کیے جا رہے ہیں۔
اومانی حکومت کی جانب سے سینکڑوں مقامی اور غیر ملکی قیدیوں کو رہا کر دیا گیا ہے تاکہ جیلوں میں کورونا وائرس کی وبا کے خدشات کو کم کیا جا سکے۔
واضح رہے کہ گزشتہ ہفتے اومان اومانی دارالحکومت مسقط کو مکمل طور پر لاک ڈاوٴن کر دیا گیا ہے۔ اس کے علاوہ ضلع مطرہ کو بھی لاک ڈاؤن کیاگیا ہے کیونکہ اس علاقے میں کورونا کے مریضوں کی گنتی میں اضافہ ہو رہا ہے، جس کے پھیلاوٴ کو دوسرے علاقوں میں روکنے کی خاطر یہ فیصلہ لیا گیا ۔جس کے بعد مْطرہ کو جانے والی تمام ٹریفک بند کر دی گئی ہے۔ جس سے رْووی، ہمریو، وادی الکبیر اور درست کے کچھ علاقے متاثر ہوں گے۔
