تفصیلات کے مطابق سعودی وزارتِ صحت نے خبردار کیا ہے کہ کووِڈ نائنٹین سے ہونے والے انفیکشن سے سب سے زیادہ خطرہ ذیابیطس اور دل کے مریضوں کو ہے۔
سعودی وزارتِ صحت کی جانب سے سرکاری ویب سائٹ پر بتایا گیا ہے کہ جن لوگوں کا امراض کے خلاف مزاحمتی نظام کم زور ہے، انھیں کورونا وائرس لگنے کا زیادہ خطرہ لاحق ہے۔
بتایا گیا کہ دل کے مریض، بلڈ پریشر اور پھیپھڑوں کے امراض میں مبتلا، ذیابیطس، کینسر اور سگریٹ نوشی کے عادی افراد کا مزاحمتی نظام کم زور ہوتا ہے جس کے باعث وہ کورونا وائرس کے خطرے کی زد پر ہیں۔
وزارتِ صحت کی جانب سے بتایا گیا کہ کورونا وائرس سے اب تک ہونے والی اموات میں یہ بات دیکھی گئی ہے کہ زیادہ تر مریض مذکورہ بیماریوں میں مبتلا تھے۔ ان امراض میں مبتلا افراد کو خصوصی ہدایت کی گئی ہے کہ وہ گھروں پر رہیں اور انتہائی ضرورت کے بغیر گھر سے نہ نکلیں تاکہ وہ وائرس سے محفوظ رہ سکیں۔
جاری ہدایات میں کہا گیا کہ جن لوگوں میں کورونا وائرس کی علامات ظاہر ہوئی ہیں، ان سے ملنے سے مکمل پرہیز کیا جائے، دونوں ہاتھ پابندی سے صابن سے دھوتے رہیں اور زیر استعمال چیزیں صاف رکھیں۔
وزارت صحت کی ویب سائٹ پر سماجی فاصلہ قائم رکھنے، مصافحہ نہ کرنے، اجتماعات سے دور رہنے، سامان نہ چھونے، ماسک کے استعمال، دستانے پہننے اور ہاتھوں کو اچھی طرح سینیٹائز کرتے رہنے سے متعلق اہم ہدایات بھی جاری کی گئیں۔
